يوميات واحدة بتتصالح مع نفسها (3)

محاولة لكسب عقلى من جديد

الهدف منها هو انى استعيد قدراتي الي شككت فيها , و عقلى الي أهملت فيه . 

_____________________________________

علشان اتصالح مع نفسى لازم اعرف الاول ازاي اتصالح مع دماغى ..اعرف ازاي اخليه يخدمني و يساعدنى بدل ما يكون عقبه في طريقى .

دماغى زعلانة منى و من اهمالي ليها لسنوات طويلة, نتيجة لإكتئاب حاد و اهتزاز في صورة الذات و ثقة بالنفس و كلام مجعلص كده  ..

و قررت كنوع من الانتقام منى انها تشتغلني و تلعب بيا الكورة ..استضعفتني و اتغذت من خوفى و من كل الطاقة السلبية الي كانت عندي و بقت اقوي منى , و بدل ما انا الي كنت مسيطرة عليها سيطرت هى عليا !

بعد سنوات طويلة دماغك معيشك فيها في قالب تفكير معين ..الوهم مع التكرار و الزن بيبقى شبه حقيقى ..مش بتعرف تفرق ان كان ده حقيقى و لا لأ ..مش بتعرف تشوف نفسك ع حقيقيتها ..مش بتقدر تعرف انت بتحب ايه و بتكره ايه ..مش قادر تشوف قدراتك و لو شفتها بتشك فيها ..مع الوقت و من غير ما تاخد بالك ,من تفاصيل صغيرة و تراكمات منسية, بيتكون ضباب و بيقعد يزيد لحد ما يوصلك انك متشوفش اي حاجة , بتوه عن نفسك تماما و الطريق محجوب بالضباب..

طب و بعدين ؟

انا مش عايزة اكمل كده 

انا عايزة اتغيير 

طب بقى انا عقلى هيرضى بالتغيير ؟ هنا بقى اتفاجئت ان عقلى خد ع الأنتخة و مش قابل التغيير حتى لو كان التغيير ده الأحسن ليه ..و بيهاجمه بكل قوة و بيقلل من كل محاولاتي و بيحاول كمان يقتلها باليأس و بكل الوهم و الضباب الي اتخلق من القالب الي عايشنى فيه..

عقلى محتاج ثورة عليه .. محتاج إعادة تأهيل ..

لازم اتخلص منه عشان اعرف ابنيه تاني من جديد ع مزاجى

اول مشكلة : عقلي خد ع الفهلوة 

عايزنى اعمل اي حاجة بأقل مجهود  و اخد اقصر الطرق الممكنة..

المحاولة عدوته الي مبيطقهاش ..

و الغباء هو احسن سلاح وهمى بيستخدمه في معركته معايا

كل لما احاول يحسسنى اني غبية ..بيطالبني بنتايج مذهلة من اول مرة ..بيطالبني بالمثالية و عدم تقبل الخطأ ..بيعيشنى في ضغط رهيب, و نقد لاذع طول الوقت لحد ما طاقتي تبقى مفيش, و انهك من المقاومة و المشى ضد التيار و استسلم في الاخر 

تاني مشكلة : التشتت و عدم التنظيم

جوه عقلى ميت حاجة و ميت فكرة , و انا و الوقت مبنعرفش نبقى اصحاب .. و النتيجة اني في الاخر معملش اي حاجة من الميت حاجة و عقلى برضه هو الي يكسب المعركة

تالت مشكلة : عدم الاستمتاع

لما بحاول اتطور من عقلى و اتحداه دايما بيبقى بخسر الاستمتاع في المعادلة ديه ..دايما فى صراع مع عقلي بيخلص ع طاقتي اول بأول, و مش بيتبقالي طاقة استمتع بيها بحاجة و  ببقى مجرد أله و حياتي كئيبة و مخزون الايجابية الي فيها مبيسمحليش غير اني ادخل انام احسنلى 

في الاجزاء الجاية هقول ازاى اتعامل مع المشاكل ديه و احلها ..

هوامش ع الماشي

انا متخلقتش ارجوز عشان اضحك جنابك و محدش غاصبك اصلا انك تقعد معايا

لو معرفتش تغلب اكتائبك متكونش سبب في اكتئاب غيرك ..

اتخلص من نفسك عشان تعرف تشوفها بوضوح

الموكا …عندما يتزوج النسكافيه بالكاكاو :D

الملل يجعلنا نتقن اعادة اخطائنا

الجنان في المشاركة احلى و اكثر ابداعا ..اللهم ارزقنى في طريقى بمجانين اجن منى نستمتع بجنانا سوا :D

من نفحات ربنا ع هذا الكوكب الكئيب ..ضحك العيال الصغيرة :D

عايزة ..عايزة ..عايزة…نفسى.. نفسى… نفسي ..القصة خلصت كده

الصمت لا يعني الهدوء..
عندما تصمت افكارنا فقط و الضوضاء التي بداخلنا نستطيع ان ننعم بالهدوء

جوايا حد لسة معاشى ساكن في حد مش بيعيش

و مفيش حاجة تداوي الروح غير الي خالقها

عندي شوية امل مبيروحش „بيألموني اكتر ما بيسعدوني ,بفتتنوني مع الوقت , بيخلوني متعلقة في المفيش
شوية امل شاكة انهم اصلا وهم !

على أمل ان يكون اخر الملل, تغيير

الحاجات الي دايما مبستنهاش بتبقى احلى و لما تيجي و الاقيها حلوة فاستناها تيجى تاني فتقوم متجيش و تبقى رذلة

ادوش نفسك بدوشة ع مزاجك فمتدوشكش قبل ما تتدوش بدوشة تدوشك و متعجبكش

و سيظل النوم احسن محسن مزاج..

دائما و ابدا لما تعوز الحاجة متلقهاش … و كذلك الناس

بى امل بيروح و مبيجيشى ,الا لما ما انا اروح اجيبه و اهزق ميتين امه :D

حنين مبينتهيش !

حنين..
لفيلم حلو لسة مشفتوش..
لكتاب هقراه هغير حياتي..
لفرحة اصحابي الي بتفرحني اكتر من فرحتى
للمتي مع اخواتي و حكاوينا بليل في اوضتنا و صوت ضحكنا العالي الي بيصحى بابا و ماما و بيجبلنا التهزيق
لرسمه حلوة هرسمها و اقول يا سلام عليا و الله انتي برنس ..
لسجدة طويلة احكي فيها عن الي مزعلني من الدنيا و مني ,سجدة تغسل روحى و عيني
لحلم هحققه هيخليني ابقى مزقططه و اقول ياااه يا رب
للي هيجي يخليني احب حياتي معاه و اغير كل خططى عشانه
لرقص لسه هرقصه هيخلي روحه طايرة و مش لامسة الارضلرقصة تانجو هيعلمهالي, و اقعد ادوس ع رجله, و هو يضحك من الوجع و من غباوتي
لحضن هدفن نفسي فيه يهون عليا كل الي عيشته و يخليني اقدر اتغلب ع خوفى و احس بأمان محستوش قبل كده
لبلاد لسه مروحتهاش هتعلم منها حاجات كتير و هقابل فيها ناس كتير
لصدفة حلوة تخليني مش مصدقة انها ممكن تحصل في يوم
لقصة حب في الوقت الصح مع الشخص الصح
للي لسه مخلفتوش و لو جيه هيغير حاجة في المستقبل جيلي مقدرش يغيرها
لثورة جاية ,ثورة بجد نعوض فيها كل العك الي فات
لناس طيبين يضحولك من قلبهم و هما ميعرفكش „يساعدوك من غير اي مصلحة
عن تفاصيل كتير قوي لسه معشتهاش او عشها و عايزة اعيشها تانيانا بقيت احن للمستقبل اكتر من الماضى !

و تظل الاسئلة الوجودية بلا جواب ,كلما حاولنا الاجابة عنها..اكتئبنا ..اختنقنا ..تهنا ..تأمر علينا عقلنا بالدخول في متاهات هل وجودنا مربوط بان نحاول ان نفهم؟! , ام كلما حاولنا ان نفهم وجودنا اصبح هشا !!لست ادريواصبحت اسئلتي عبئا عليا ..من المحرمات العقلية احيانا..من مذهبات العقل دائما

جيه الوقت الي تقنع عقلك انك ضحكت عليه و تتأسفله,عن كل مرة قللت منه و شككت في قدراته,عن كل مرة قلت مش هيقدر و هو كان يقدر.عن كل في مرة خفت تجرب لتتأكد انه ميعرفش مع انك مجربتش!

قوالب التفكير

قوالب التفكير بتخليك مش عارف تشوف اي حاجة ..بتخلق لنفسك حالة و تفهم نفسك مفيش غيرها!تبقى زهقان و قرفان من كل حاجة ..زهقان من كل الحاجات الي ممكن تسليك  و تحس انك مكسل و ملكش نفس تعمل حاجة و تبقى مفهم نفسك كده و مستني مثلا حد معين يكلمك و يسليك و ميكلمكش ..فتضايق اكتر و تزهق اكتر !!كل ده انت حاطط نفسك في قالب تفكير معين ..بتشوف كا حاجة ع اساسه و بتبني رد فعلك اتجاه كل حاجة جواه  ..مع ان الدنيا براح..مع ان فيه قوالب تفكير تانية ممكن نصنعها برضه حلوة غيرهاقول لنفسك في وسط ما انت واهم نفسك بقالب التفكير ده …انك حمار ..ايوه حمار عشان انت ملكش الا حياه واحدة و بتضيعها في حاجات هبلة ..و مستني حاجات تبسطك يا هتحصل يا مهتحصلشابسط نفسك يا ابن الكئيبة ..او ع الاقل متعكننش ع نفسك بحاجات زيادة انت اصلا الي واهم نفسك بيهافوق لنفسك كده ..انت برنس .دلع نفسك كدهون بقى و ده مش كلام انشا الا لو انت حاطيته في القالب ده

أحنا مش ملايكة مهما كنا طيبين و الي قدامنا مش شياطين مهما عملوا حاجات وسخة . و برضه  

احنا الي بنسمح بالي بيحصلنا بشكل او بأخر .. أن الواحد يقتنع بالفكرة ديه هتسهل عليه ان  

يخلص نفسه من عبأ علاقات مش راضية تخلص من الذاكرة 

انا..لبن سمك تمر هندي !

..انا الي طيبة في شري

و شريرة في طيبتي

الصبورة في تسرعي

 الانانية في خوفى

 الي كل لما اساعدني اخذلني

 ..و العتاب بيتعبني

و الحزن بيبهتني

 الي افرحلك و معرفش افرحلي

  و دمي خفيف في  همى

انا الي ضميري خانقني و خنقته تخنقني

 بضحك من غير سبب و في وسط ضحكي اعيط من غير سبب

انا الي متناقضة بس لسه مش منافقة

مش اجتماعية بس عشرية

عاقلة لكن افكارى لاسعة

 مسطولة مع اني فايقة

انا الكلام الي حروفه متشقلبه

 الامبالاه الي مليانة احاسيس ملخبطة

 الفكرة الي تايهة وسط تفاصيل و حكاوي صغيرة

انا الي اضحكلك عشان منبقاش انا و انت كأبة زي بعضنا

انا الي مبحبنيش دايما

انا الاحلام الي ضيعتها

و الاحلام الى مش عايزة تتعلق في الهوا

انا فكرة لسه مكتشفتهاش

 المهيبرة و طاقتي مفيش

 البدايات الي مبتكملش

 بواقي حكايات مبتخلصش

انا الي بضحك ع غباوتي

 انا ال يزعلك يحسسني بعجزي و قلة فرحك تبقى همي

انا طولة اللسان و الكسوف الي مستخبى في ضحكة في وسط الكلام

انا الي قد ما احب بخاف اتعلق

انا لبن سمك تمر هندي ..

ايوه مبحبش السمك.. بس انا برضه فيا حاجات كتير مبحبهاش

انا الجنان المربوط

 لخباطية, في منها التيت و الترابتيت..

فيها اسئلة كتير ملهاش جواب و اسئلة تانية عايشة يمكن الاقيلها ع جواب

الندم حلو !

هى ليه الناس شايفة الندم تهمة او كلب جربان بتحاول تهرب منه؟

الندم شرط من شروط قبول التوبة يا حضرات

الندم هو اول خطوة عشان تبدأ ع نضافة

الندم حاجة حلوة ..حاجة انسانية 

مفيش ضمير حى مبيندمش

و مفيش حد مبغلطش

هو الحلم الي تتحمسله قوي و بعدين بفتر و يرجع تاني تتحميله و هكذا

حلمك اصلا ؟ و لا انت الي بتحاول تخليه حلمك؟

انت الا مش عارف تحافظ عليه و لا هو ميستهلش انك تحافظ عليه !!

كل يوم اسئلني و احتار في الاجابة

سبحانك

في الوقت الي بزهق و ببقى عايزاك تبعتلي حد يخفف عني و يشاركني الي انا فيه

بتبقى عايز تقولي انا مش عايز ابعتلك حد لحد ما تصاحبي انتي نفسك „لحد ما تخففى انتي عن نفسك

انا الطريق ..انا الي بقاليلك ..اني الي مستنيكي تكلميه و تفضفضيله و تشكى ليه

انا الي هغنيكي عنهم بيا 

و انا الي هساعدك تبسطى نفسك من غيرهم

الدنيا بخلقها بيحجبوكي عني .. و انا عايز اساعدك تشوفيني

انت الامل
انت الحب الغير مشروط
و هو ده سر الوجود سبحانك

قرف انك طول الوقت تفكر ايه الي ممكن يتقال و ايه الي ميتقلش ..انك تقدع تخبي حته من نفسك بالكلام ..او تظهر الي انت عايزة نفسك بالكلام ..قرف انك علطول بتحسبها و بتفكرلها 

هو مينفعش الحياه تبقى اسهل من كده ..الي حاسس بيه تقوله علطول !!

احنا دايما بنتشد لحاجات مبتشدش لينا

و دايما بنروح المكان الغلط عشان المكان الصح مبيغريناش نشوفه

احنا دايما حكاية متلخبطة و لما بتتعدل متعجبناش

مفيش حاجة ببلاش

كل حاجة لازم تدفع تمنها

و مش كل حاجة تمنها فلوس

 فيه الى هتدفعه من وقتك و من افكارك و من مشاعرك و من سلامك الداخلي و من ذكرياتك و من احلامك و من ندمك و فرحك ….

هتدفع يعني هتدفع :D

كل يوم هلاقي حاجات بتزعلني منى لسه مغيرتهاش

كل يوم فيه حاجات ممكن تبوظلي توقعاتي ليوم جميل نفسى يكمل ع خير

و هيفضل كده كل يوم

لكن كل يوم هعمل تفاصيل صغيرة حلوة تفرحني 

و هحاول اتعايش مع الي لسه مغيرتوش لحد ما اغيره في يوم

كل يوم هحافظ ع شوية الامل الي حيلتي ليروحوا و ميرجعوش

مش هكتئب طول اليوم لو معرفتش افرح

و لو اكتئبت هغسل وشى و اهدا و ابدأ من جديد

كل يوم مش مثالي ..بس ممكن يبقى فيه حاجات مثالية متحصلش في اي يوم

كل الحاجات الي مش عارفة اغيرها فيا مقيداني و مسلسلاني

مفيش اسوء من انك تحس انك ضعيف قدام نفسك

مش عارف تسيطر عليها

و لا عارف تسيطر ع افكارك

بيتلعب بيك منك

عاملة زي الكورة الي عمالة تتشاط بين افكارى و حتى مبتدلخلش و لا مرة الجون و بتتطلع علطول اوت

انا حاسة اني متأمرة عليا !

انا مش طيقاني

زعلانة منى ..او زعلانة عليا 

انا ليه بكتب ..

انا بكتب في الاساس عشانى انا ..عشان بحب اكتب ..عشان انا بعبر عن نفسي احسن بالكتابة ..عشان الكتابة صديقتي..بكتب الي يجي ع بالي ..بكتب  عشان اونسني …عشان اطلع طاقتي السلبية ..عشان ازعق و اصرخ و اتنطط و ارغي و افضى و افضفض و اشجعني و اهزقني و عشان كل حاجة

لكن بتبسط جدا لما الاقي كلامي اثر في الناس من غير ما اقصد ..او اني عرفت اعبر عن كلام جوا حد مش عارف يخرجه و يقوله ..لما الناس يحبوا كلامي ..لما يخليهم يفكروا ..لما يتشابه معاهم في موقف ..لما يخليهم يبتسموا ..لما يديهم امل ..لما اعبر عنهم بطريقة ما ..او امس حاجة جواهم.. او نبقى بنفكر في نفس الحاجة 

متحاولش تجري ورا حاجة مش بتاعتك ..

متحاولش في قصة خسارنة

متعدشي نفسك بكل غباوتها و مللها

متكملش .. و انت متأكد انك عمال تخبط و الطريق مش واضح قدامك

متسمعش كلامي ..عشان انا و انت مختلفين

حب لوكشة واحدة متقعدش تفصص :D

الفهم احيانا بيبفى عدو الحب ..

مش هتعرف تحب حد بجد و انت بتحاول تفهم كل حاجة ورا الي بيقوله ..انك تفسر ليه عمل كده؟ ..انك تنتقد تصرفاته حتى بينك و بين نفسك ..انك تقعد تفصفص في عيوبه ..

الناس الي تحبهم ..فوتلهم ..متحولش تفهم كل حاجة عنهم …اقبلهم بعبلهم كده .. و بطل نقدك ليهم شويه هتلاقى نفسك رجعت تحبهم زي الاول

اشغل نفسك بكلام ملوش لازمة

بحكاوي الزهقانين و فرجة التافهين

ببص ع المفيش للساعات

حط حلمك ع الشماعة و حط مصيرك  معاه كمان

وقف عقلك في حتة فاضية و سيبه و امشي

و اوعدك هتموت حمار

ميشت في المسار الي محطوطلك تمام

لا بصيت يمين و لا شمال

شفت حاجة ؟

و لا حتى كان فارق معاك

صاحبت مين ؟ صاحبت توهتك في الشوارع 

حبيت مين؟ حبيت الي يترميلك من اي صاحب نصيب

طب عيشت ليه ؟ اكيد قلت و معيشي ليه ما انا مليش في الاختيار و مقدرش ع الانتحار

ما انت اصلا حمار و فاكر انها عيشة و السلام

,كلما ازدادت خيباتي بالناس ازداد ايماني بأن انشغالي باحلامي هو افضل شىء لي

هو العلاج الافضل لامتصاص كل الخيبات..و هو السعادة التى ليست مرهونة سوي بما 

افعله انا

 كلما وفيت لاحلامى و اهتميت بها ..وفيت لى احلامى و اقتربت منى اكثر

عكس ما يحدث مع الناس

القمر جميلا لانه بعيد ..و كذلك الناس

فانا احب الناس الغريبة اكثر ..الناس البعيدة ..و اكتفى بقلة قليلة منهم بالقرب منى

يعني ايه يبقى فيه طفل في البيت :

1- كل الادراج الي طولها اققل من متر بتتفضى او بتتقفل ,و لو ده محصلش هتلاقي ورق طاير في كل مكان ,او مثلا علب و كراتين احشائها كلها بره, او كتب بقيت قصاقيص ورق و هكذا..

2-هتلاقي المكان بقى أبيض في أبيض, لو عثر طفل ع علبة مناديل ع سبيل الصدفة في سكته 

3- لو نسيت باب الحمام مفتوح هتلاقيه طالع بالمساحة مثلا ,او واقع في القاعدة ,او طالع و هو ماسك الشبشب كغنيمة حرب

4-كل كوبسات الكهربا الي قريبة من الأرض لازم تتلزق(عشان هما بيعتبروا صوبعهم فيش طبيعية) و لزق قوي, عشان ديه هواية عند الاطفال اصلا لوحدها انهم يشيلوه

5- لو نسيت باب المطبخ مفتوح هتلاقي حلل المطبخ بقيت ديكور في كل الأوض ده ع اقل تقدير ,اما لو عنده حس موسيقى هيقلبها ألة عزف يصحى بيها الجيران و جيران الجيران كمان

6- و انت ماشي هتلبس في اللعب الصغيرة الحقيرة ديه الي بتبقى عاملة زي الدبابيس ..فأحسنلك متقلعش الشبشب من رجلك خالص

7- الجزامة بقى ديه كنز .. يا سلام بقى لما بتتفتح و محدش واخد باله ..بتتقلب لحد ما تفضى خالص ,و تتحول الجزم الي فيه الي لعب ,و نوع جديد الاكسسورات الي بتتلبس فى الايد ..اه و الله في الايدين !

8- باب التلاجة بقى ده مغارة على بابا ,و رحلة استكشاف ما وراء الابواب المغلقة

9- انسى ان بيتك يبقى منظم اكتر من 3 دقايق و نص ,و انسى انك تلاقى حاجة في مكانها

10- انسى انك ممكن تاكل اندومي من غير ما يرشق معاك حد في الطبق

11- انسى انك ممكن تعرف تنام الصبح او العصر او حتى بليل .. النوم ده هيبقى مجرد شكليات ,او غاية لا تدرك

12- هتتعلم البالية لو مكنتش اتعلمته و انت بتحاول تجيب حاجة من حته هو نايم فيها ,او بتحاول تخرج من الاوضة بعد ما قعدت متذنب جمبه لحد ما ينام ساعته

كل النقط ديه ولا حاجة لأن الي يجرب يقعد مع طفل في البيت حقيقى هيتنقط , و انسوا خالص حوار ان الاطفال احباب الله و الكلام ده ..ده كدب و الله كدب 

المشكلة دايما في البدايات..انك تخلص عمرك في بدايات مش بتاعتك..تتوه نفسك في حكايات مش ليك..بس هتعرف منين لو مبتدأتش ؟!

مادام مش عارف لازم تبدأ 

ابدأ و خلاص ,جايز لما تبدأ تعرف تشوف احسن من و انت بعيد

عايزة استمتع !

عايزة استمتع بالحاجات و التفاصيل, مش تبقى مجرد عدد في حياتي, او مجرد مهمة تم انجتزها و السلام

عايزة استمتع بكل  كتاب اقراه ,و يأثر فيا, و يغير فيا فكره,يضيف ليا مش ينضاف لمتكتبتي 

عايزة اسمع كل اغنية بتمعن و اتمزج بيها, مش ابقى حاطة السماعات فى وداني عشان مسمعش الدوشة او تسليني و انا بعمل اي حاجة

عايزة استمتع بالصلاة ..بكل ركعة و بكل سورة و بكل سجدة,استريح بيها مش استريح منها

عايزة اسمتع باللعب مع العيال الصغيرة ..احب دوشتهم و وجع الدماغ بتاعهم مش اسربهم و اتهرب منهم

عايزة استمتع بكل حضن كأنه الاخير و اطول فيه

عايزة استمتع بالابتسامة .. اطلعها من قلبي بجد فتدوايه

عايزة استمتع بتأمل الناس في الشوارع و اسمع حكاويهم في الباص 

عايزة استمتع بالقرأن ..افهمه مش مجرد اقرا ورد كل يوم

عايزة لما اتفرج ع فيلم ..اعيش فيه ..مقمش من عليه الا لما اخلصه ..احترمه ..اه احترمه و محترمش الفيلم ليه لو كان حلو

عايزة اركز في كلام الي بحبهم و مبقاش مسطولة ..اركز في التفاصيل مش اقول مممم و خلاص عشان ميحسوش بالتجاهل

عايزة استمتع بكل قطمة في طبقى مش  املى بطني و خلاص ..استمتع بكل بوء في كوباية الشاي مش انساها لحد ما تبرد زي كل مرة

عايزة اول لما اسمع مزيكا بحبها اقوم ارقص عليها مش اكسل كالعادة

عايزة و انا بحقق احلامي منساش استمتع بيها و تتقلب لمجرد روتين او حمل تقيل

عايزة احس اني عايشة ..بعرف احس ..بعرف احب ..بعرف استمتع