يا رب
انا مبحبش ادعى انى ادخل جنتك بس بدعى مدخلش نارك ..اه انا بخاف من النار يا رب
انا بدعى اموت و انت راضى عني ..يا رب متبقاش غضبان عليا
رضاك عنى و حبك ليا اهم من اني ادخل الجنة ..الجنة ديه جزاء ..بس انت مدخلقتناش عشان ندخل جنتك ,صح يا رب ؟ مش انت خلقتنا عشان نعرفك ؟ انا لسه حاسة انى عايزة اعرف عنك كتير قوي يا رب ..ساعات بس ببقى نفسي يبقى عمري طويل عشان اعرفك اكتر عشان استغل فرصتك (الي هى حياتي )احسن
انا كنت خايفة اقابلك قبل كده عشان مكسوفة منك , و حاسة انى مصُنتش الامانة الي هى حياتي, و غير انى كنت خايفة انك تبقى زعلان منى عشان انا مقصرة في حقك قوي ..بس انا يا رب نفسي احب لقائك و ابقى مبسوطة انى في اخر الرحلة هقابلك.. فمتخلنيش اخاف و النبي يا رب..انا عايزة ابطل اخاف ,اخاف من كل حاجة و مخفش بس الا ع زعلك .. وصلنى للمرحلة ديه يا ربي
انا بخاف ابقى منافقة , بخاف من الكبر , بخاف من البعد عنك ,بخاف من ضعفى ..بس انا بحب خوفى معاك و منك
بس يا رب انا بخاف كمان من نفسي , بخاف اقرب منك فاتبسط من نفسي و احس بتكبر و زهو بنفسي و انى احسن من عبادك الي بيعصوك .. بخاف قوي من كده يا رب ..احميني من نفسي يا رب و من الكبر و ارزقني بالتواضع و متشغلنيش الا بيك
انا بقيت شاكة في حاجات كتير ,بس انا عارفة انى مش هتزعل منى عشان انا بجتهد في فهم دينك ,انا كفرت برجال الدين و بالشيوخ الا من رحمتهم يا رب ..انت جميل بس هما ابعد ما يكون عن كده ..انت مخلقتناش عشان نشقى بس هما بيصعبوا كل حاجة علينا و هيكفروا الناس بالي بيعملوه ..يرضيك كده يا رب ؟
انت يا رب مبتحبش الكهنوت في الدين لكن دلوقت الشيوخ كلهم بقوا رجال كهنوت و عايزين يفرضوا فهمهم لكلامك ع انه هو الطريق الوحيد الصح ليك !
نفسي يا رب ابقى من جوه زي بره ..بس مش كل حاجة ينفع تبان عشان كده انت ستار ..كتر الستر خلانى ابقى منافقة في حاجات ..بكره ان الناس ساعات بتشوفنى بطريقة مش هى ديه انا, و في نفس الوقت مش بقول ع الى انت سترته فيا عشان الجهر بالذنب مش حاجة حلوة ..هو انا كده ابقى منافقة يا رب ؟
انا دايما مقصرة في شكرك و عبادتك و مش بفتكرك بجد الا لما بكون في ضيق او مرض ..سامحنى يا رب انا معنديش دم و عارفة
يا رب ارزقني حلاوة الايمان ,بيقولوا عليها حلوة قوي ..نفسي استمتع بالصلاه يا رب انا مش بعرف استمتع بيها ..ده انا بحب ذكرك و انا بتمشى و بحس بصفاء اكتر من الصلاة !يا رب اجعل قرة عيني في الصلاة و ارح بها نفسي و اصلح بها حالي و اسعد بها قلبي ..نفسي قوي يا رب محسش ان الصلاة حمل ..بس بجاهد نفسي اهو
يا رب انا بحبك قوي و عارفة انك بتحبني برغم كل الي بعمله و ان مفيش احن منك و انك سندي في الدنيا ..متسبنش يا رب ابدا ..اهدينى للحق و ارزقني اتبعاه
انا عبدتك الي بتدلع عليك عشان عارفة انك بتحبني :D
12-10-2013
ليست هناك تعليقات:
إرسال تعليق