لما جيه عيد ميلادي السنة ديه كنت عارفة ان عدي من عمرى 22 سنة من غير ما اعمل فيهم حاجة مهمة بالنسبة ليا, و لا حققت حاجة من احلامى الي اصلا مكنتش لسه اعرفها, و لا سبت بصمة تذكر بعدي لو مت, و لا حققت سعادة و لا رضى عن حياتي و الاسوء من كده انى كنت خايفة لو حتى اتضاعف عمرى يبقى الحال كما هو عليه و افضل لسه خايفة من كل الحاجات الي فضلت عايشة عمرى خايفة منها! كنت محبطة و مخنوقة و حاسة انى واقفة في المفيش ومليش اي بوصلة اقدر اعرف منها انا مفروض اروح فين ..
السنة الجاية مفروض هبقى بأذن الله اتخرجت ..طب و بعدين ؟ طب لو حتى كل الي عدى كان ملوش لازمة ايه الي مخططاه لحياتى الجاية ..الصراحة مكنش عندي اي خطط و الصراحة ان ده كان مضايقني اكتر ..عايزة اشتغل ,طب في ايه معرفش ..طب هو الشغل هو اهم حاجة في حياتي ؟ طب بالنسبة ليا انا ! انا عايزة ايه اصلا و عايزاه ليه ..كان فيه اسئله كتيرة قوي في دماغى مش لاقيلها اجابة بس وصلت لحاجة واحدة كنت متأكدة اني عايزها و هى : ان السنة الجاية هتكون سنة تغيير في حياتي , لما يجي عيد ميلادي الجاي هبقى عملت تغيير حقيقى في حياتي مش زي كل سنة..
قعدت افكر ايه التغيير الي انا محتاجة فعلا الي يقدر يعمل فرق في حياتي كبير , و بعد تفكير طويل و تبديل في الاولويات و في الاحلام وفي خطط المستقبل و الي عدى في الماضى لقيت ان كل محتاجة هو انا !!
اولويتي الاولى ان اكتشفني من جديد و اواجهنى و مهربش منى و اتصالح معايا و احررنى من خوفى عشان اقدر اشوف نفسي ع حقيقتها الي كنت اضعف و اجين من انى اتقبلها ..اي حاجة غير كده مش هيبقى ليها اي معني او هتقدر تخليني سعيدة
اي حاجة هعملها السنة دي هتبقى اداه تساعدنى اوصل لهدفى ده مش اهداف في حد ذاتها
و الحقيقة الاهم الي اكتشفتها ان ده الي اتخلقت عشانة اصلا, و ان ديه مهمتى طول ما انا عايشة
حياتي مجرد رحلة لاستكشاف نفسي و السمو بها
مبقتش خايفة اختار طريق غلط لأن الطريق الغلط هكتشف فيه حاجات عن نفسي
و لقيت انى اصلا مش لازم مخفش ..لكن اقدر مسمحش لخوفى يمنعني اعمل الي عايزاه ..انا الي اتحكم في خوفى مش خوفى الي يتحكم فيا
الخوف زي شهواتنا الانسانية ..نقدر نسموعليه و نحرر نفسنا
ليست هناك تعليقات:
إرسال تعليق